ԱՄՆ բանագնացը կհանդիպի ՀԱՄԱՍ-ի առաջնորդի հետ. NYT

ԱՄՆ նախագահի հատուկ բանագնաց Սթիվ Ուիթքոֆը նախատեսում է հանդիպել Գազայի հատվածում ՀԱՄԱՍ-ի առաջնորդ Խալիլ ալ-Հայայի հետ։ Այս մասին, հղում անելով իր աղբյուրներին, հայտնել է The New York Times-ը։

Ըստ պարբերականի՝ առաջիկա հանդիպման հիմնական թեման լինելու է Գազայում հնարավոր հրադադարի հաստատումը։ Այս քայլը պետք է հաստատի Թրամփի վարչակազմի պատրաստակամությունը՝ բաց երկխոսություն սկսել ՀԱՄԱՍ-ի հետ։

Միևնույն ժամանակ, թերթի աղբյուրներն ընդգծել են, որ հատուկ ներկայացուցչի այցի հստակ ժամկետները դեռևս որոշված չեն, և նրա ծրագրերը կարող են փոփոխվել։

Սա Ուիթքոֆի և ՀԱՄԱՍ-ի ներկայացուցիչների առաջին շփումը չէ։ Թրամփի դեսպանորդը հոկտեմբերին արդեն իսկ հանդիպել էր ՀԱՄԱՍ-ի մեկ այլ ներկայացուցչի հետ՝ Իսրայելի հետ Գազայի հատվածում հրադադարի շուրջ ընթացող բանակցությունների շրջանակում։