Ալյասկայում խոշոր տարհանում է «Հալոնգ» թայֆունի պատճառով

Ալյասկայի պատմության մեջ ամենախոշոր օդային տարհանումներից մեկն է ընթանում։ Հարյուրավոր մարդիկ են տեղափոխվում ափամերձ գյուղերից, որոնք ավերվել են «Հալոնգ» թայֆունի մնացորդների հետևանքով առաջացած ուժեղ քամիների և ալիքների պատճառով։

Աղետի հետևանքով ջրի մակարդակը ռեկորդային բարձրության է հասել, տներ են քշվել ջրի հոսանքով, որոշ դեպքերում՝ բնակիչների հետ միասին։ Առնվազն մեկ մարդ զոհվել է, երկուսը համարվում են անհետ կորած։ Շուրջ 1500 մարդ տեղավորվել է ժամանակավոր կացարաններում։ Կիպնուկ և Կվիգիլինգոկ համայնքներում իրավիճակը հատկապես ծանր է։

Արտակարգ իրավիճակների կառավարման պաշտոնյաների խոսքով՝ շատ տներ այլևս բնակության համար պիտանի չեն, հատկապես՝ մոտեցող ձմռան պայմաններում։ Տարհանվածներից շատերին տեղափոխում են ափամերձ գյուղերից 500 մղոն հեռավորության վրա գտնվող Անքորիջ քաղաք։

Այս ճգնաժամը ուշադրություն է հրավիրել Թրամփի վարչակազմի կողմից իրականացված բյուջետային կրճատումների վրա։ Մասնավորապես, չեղարկվել է Շրջակա միջավայրի պահպանության գործակալության կողմից Կիպնուկ համայնքին տրամադրվող 20 միլիոն դոլարի դրամաշնորհը։ Այն նախատեսված էր գետի էրոզիայից պաշտպանվելու համար։ «Երբ խոստումը խախտվում է, դա վտանգի տակ է դնում մարդկանց անվտանգությունը, տները և ապագան», - նշել է իրավապաշտպան կազմակերպության ղեկավար Ջիլ Հաբիգը։