«Թրամփի երթուղին» Միջին միջանցքի կարևոր մասն է․ Ալիև

Ադրբեջանի նախագահ Իլհամ Ալիևը, ելույթ ունենալով Կասպյան քաղաքական կենտրոնի կողմից կազմակերպված 6-րդ Կասպյան բիզնես ֆորումի մասնակիցներին, որը նվիրված էր «Միջին միջանցքի երկայնքով. կապ, ֆինանսներ և էներգետիկա» թեմային, ընդգծել է «Միջին միջանցքի»՝ որպես լայն աշխարհագրական տարածք ընդգրկող ռազմավարական նախագծի կարևորությունը։

Նա այն բնութագրել է որպես հուսալի և անվտանգ երթուղի, որը Կասպից ծովով կապում է Եվրոպան Ասիային՝ հանդիսանալով բեռների փոխադրման ամենակարճ և օպտիմալ ուղին։ Ալիևն առանձնահատուկ նշել է, որ այս տարվա օգոստոսի 8-ին Վաշինգտոնում, ԱՄՆ նախագահ Դոնալդ Թրամփի ներկայությամբ, Ադրբեջանի և Հայաստանի միջև ստորագրվել է համատեղ հռչակագիր։ Այս համատեքստում նա ընդգծել է, որ փաստաթուղթը հիմք է դրել «Թրամփի երթուղի՝ հանուն միջազգային խաղաղության և բարգավաճման» (TRIPP) ստեղծմանը, որը կապահովի անխոչընդոտ կապ Ադրբեջանի հիմնական տարածքի և Նախիջևանի Ինքնավար Հանրապետության միջև։

Ադրբեջանի նախագահը վստահություն է հայտնել, որ TRIPP-ը կդառնա «Միջին միջանցքի» կարևոր հատված՝ միացնելով Ասիան և Եվրոպան, ընդլայնելով միջազգային տարանցիկ փոխադրումների հնարավորությունները, նպաստելով տարածաշրջանի երկրների բարեկեցությանը և դրանց ինտեգրմանը համաշխարհային մատակարարման շղթաներին։

Ալիևը հավելել է, որ երթուղին լայն հնարավորություններ կստեղծի էներգառեսուրսների փոխադրման, էլեկտրաէներգիայի, հատկապես վերականգնվող էներգիայի արտահանման, ինչպես նաև օպտիկամանրաթելային գծերի անցկացման համար, ինչը նոր խթան կհաղորդի տարածաշրջանը միջազգային առևտրի և թվային հաղորդակցության կենտրոն դարձնելուն։

Ադրբեջանի ղեկավարը շեշտել է, որ Բաքուն մոբիլիզացրել է բոլոր ջանքերը՝ տվյալ երթուղու շուտափույթ իրականացման համար։