Սամվել Ալեքսանյանի ընկերությունն Ադրբեջանով ցորեն է ներկրում

Ռուսաստանից Հայաստան ցորենի ներկրումն Ադրբեջանի տարածքով իրականացնող ընկերությունը «Բաղրամյան» ՍՊԸ-ն է։ Այս տեղեկությունը ReOpen-ի հետ զրույցում հաստատել է ընկերության տնօրեն Վլադիմիր Գասպարյանը՝ ներկայացնելով տնտեսական և լոգիստիկ այս որոշման հիմնավորումները։

Գասպարյանի խոսքով, առաջին խմբաքանակի անխոչընդոտ տեղ հասնելը արդեն իսկ իրողություն է։ «Եթե ՀՀ-ում բեռի հետ կապված մի ամիս խնդիր լինի, ու մեր ենթադրյալ կասկածների հիման վրա չբերեինք և այս հնարավորությունից չօգտվեինք, ինչքանո՞վ ճիշտ կլիներ։ Կարծում եմ՝ մի ավել ճանապարհ ունենալը, ավել դուռ բացվելը միայն ողջունելի է», - ասել է նա։

Ընկերության տնօրենը որպես կարևոր հիմնավորում առանձնացրել է Վերին Լարսի անցակետի թեթևացման հնարավորությունը, որը տարիներ շարունակ մնում է հայկական բեռնափոխադրողների գլխավոր մարտահրավերը։ Անդրադառնալով հարցին, թե արդյոք այս նոր ճանապարհը կհանգեցնի հացի գնի նվազման, Գասպարյանը նշել է, որ էական ազդեցություն սպասել պետք չէ։ Նրա խոսքով, ցորենի գինը մնում է նույնը, իսկ տրանսպորտային ծախսը, թեև ավելի էժան է, սակայն ոչ զգալի չափով։ «Ոչ թե 50 տոկոս կամ 20 տոկոս, այլ ավելի փոքր թիվ է», - պարզաբանել է նա։

Անդրադառնալով թեմային, թե արդյո՞ք այդ երթուղուց օգտվելը անվտանգային ռիսկեր չի պարունակում, Գասպարյանն ընդգծել է․ «Ինքը ընդամենը տրանզիտ է անցել, երկաթգծով է անցել, այնտեղ կապարակնքված բարձվել է, կապարակնքվել է Ռուսաստանի Դաշնությունում, Հայաստանի Հանրապետությունում կնիքները մենք ենք, այսինքն արդեն բացվել էլի»։

Իսկ մտահոգությանը, թե Ադրբեջանը կարող է մի օր որոշել փակել ճանապարհը, տնօրենը պատասխանել է, որ դա իրենց վերահսկողությունից դուրս է, սակայն ընկերությունն ունի այլընտրանքային ծրագիր։ «Եթե որոշի փակել, մենք մեր մեքենաներով էլի կբերենք այնպես, ինչպես մինչ այս ճանապարհի բացելն էր՝ էլի Փոթիով լաստանավով կբերենք», - վստահեցրել է նա։

Ներկրման ապագա ծավալների և Ադրբեջանի կողմից սահմանված տարանցման պայմանների մասին Գասպարյանը դեռևս հստակ տվյալներ չի հայտնել՝ նշելով, որ թեման քննարկում են ռուսական կողմի հետ։

Նշենք, որ «Բաղրամյան» ՍՊԸ–ն պատկանում է ԱԺ նախկին պատգամավոր, գործարար Սամվել Ալեքսանյանի ընտանիքին և ցորենի շուկայում ունի գերիշխող՝ ավելի քան 50 տոկոս մասնաբաժին։