Ալեն Սիմոնյան. Խաղաղությունն Ադրբեջանի հետ հաստատված է

ՀՀ Ազգային ժողովի նախագահ Ալեն Սիմոնյանը հանդես է եկել մի շարք հայտարարություններով՝ անդրադառնալով Հայաստան-Ադրբեջան խաղաղության գործընթացին, Հայաստանի արտաքին քաղաքական վեկտորին և տարածաշրջանային ենթակառուցվածքային ծրագրերին։

Անդրադառնալով Բաքվի հետ հարաբերությունների կարգավորմանը՝ Սիմոնյանը նշել է, որ խաղաղության գործընթացը հասել է որոշակի տրամաբանական փուլի։ «Հռչակագրի ընդունումը և խաղաղության համաձայնագրի նախաստորագրումը վկայում են այն մասին, որ խաղաղությունն արդեն հաստատված է», - հայտարարել է նա։ ԱԺ նախագահը, սակայն, ընդգծել է, որ քաղաքական պայմանավորվածությունները դեռևս չեն լուծում բոլոր խնդիրները։ Նա առանձնացրել է երկու հիմնական հումանիտար մարտահրավեր։

«Ադրբեջանում պահվող անձանց, ռազմագերիների հարցը շարունակում է մնալ լուրջ խնդիր, որը պետք է լուծվի», - նշել է Սիմոնյանը։ Բացի այդ, նա կարևորել է անհետ կորածների ճակատագրի պարզաբանումը՝ այն անվանելով «կարևոր հումանիտար առաջնահերթություն»։

Խոսելով տարածաշրջանային համագործակցության հեռանկարների մասին՝ ԱԺ նախագահը ներկայացրել է Հայաստանի «Խաղաղության խաչմերուկ» ծրագիրը՝ որպես անխափան հաղորդակցություն ապահովելու տեսլական։ Նա նշել է, որ TRIPP նախագիծը բխում է հենց այս տրամաբանությունից։ Ծրագիրը, ըստ նրա, նախատեսում է ոչ միայն երկաթուղու, այլև մայրուղիների, խողովակաշարերի, էլեկտրահաղորդման գծերի և կապի մալուխների կառուցում Հայաստանի, Ադրբեջանի և հարակից երկրների միջև։

Իր ելույթում Ալեն Սիմոնյանը անդրադարձել է նաև Հայաստանի արտաքին քաղաքականությանը՝ ողջունելով հանրության ակտիվ դիրքորոշումը եվրաինտեգրման հարցում։

«Մենք ուրախ ենք տեսնել մեր հասարակության ակտիվ դիրքորոշումը եվրաինտեգրման հարցում», - հայտարարել է նա։ Սիմոնյանը շեշտել է, որ ԱՄՆ-ն և ԵՄ-ն զգալի ներդրում են ունեցել Հայաստանում ժողովրդավարության զարգացման գործում՝ հավելելով, որ երկիրը վստահորեն ընտրել է ժողովրդավարական ուղին և մտադիր է անշեղորեն հետևել դրան։