Աֆղանստանում 6.3 մագնիտուդով երկրաշարժ. կան զոհեր

Նոյեմբերի 3-ին, վաղ առավոտյան, Աֆղանստանի հյուսիսային Մազարի Շարիֆ քաղաքի մերձակայքում տեղի ունեցած 6.3 մագնիտուդ ուժգնությամբ հզոր երկրաշարժի հետևանքով զոհվել է առնվազն 10 մարդ, վիրավորվել՝ շուրջ 260-ը։ Իշխանությունները նախազգուշացնում են, որ զոհերի թիվը, ամենայն հավանականությամբ, կաճի։

ԱՄՆ Երկրաբանական ծառայության (USGS) տվյալներով՝ երկրաշարժը տեղի է ունեցել 28 կմ (17.4 մղոն) խորության վրա՝ Մազարի Շարիֆ քաղաքի մոտ, որի բնակչությունը կազմում է մոտ 523,000 մարդ։ Ըստ Սամանգան նահանգի առողջապահության վարչության խոսնակ Սամիմ Ջոյանդայի՝ այսօր առավոտվա դրությամբ հիվանդանոցներ են տեղափոխվել 150 վիրավոր և 7 զոհ։ Տվյալները հիմնված են երկուշաբթի առավոտյան հիվանդանոցներից ստացված տեղեկությունների վրա։

Տեղական իշխանությունների պաշտպանության նախարարությունը հայտնել է, որ ամենից շատ տուժել են Բալխ և Սամանգան նահանգների որոշ շրջաններ, ինչի հետևանքով զոհեր են գրանցվել։ Ռազմական փրկարարական և շտապ օգնության ջոկատներն անմիջապես մեկնել են դեպքի վայր՝ սկսելով մարդկանց փրկելու, վիրավորներին տեղափոխելու և տուժած ընտանիքներին աջակցելու աշխատանքները։

Առողջապահության նախարարության խոսնակ Շարֆաթ Զամանը նշել է, որ փրկարարական ջոկատներն ակտիվ աշխատում են, և զոհերի ու վիրավորների թիվը կարող է աճել։ «Առողջապահական խմբերը հասել են տարածք, և մոտակա բոլոր հիվանդանոցները բերվել են պատրաստականության վիճակի», - ասված է նրա հայտարարության մեջ։

ԱՄՆ Երկրաբանական ծառայությունը հրապարակել է «նարնջագույն» մակարդակի տագնապ, ինչը նշանակում է, որ «զգալի զոհերը հավանական են, և աղետը կարող է լայնածավալ լինել»։ Նախկինում այս մակարդակի տագնապով իրադարձությունները պահանջել են տարածաշրջանային կամ ազգային մակարդակի արձագանք։

Բալխ նահանգի խոսնակ Հաջի Զաիդի խոսքով՝ երկրաշարժի հետևանքով մասամբ վնասվել է Մազարի Շարիֆի սրբավայրը՝ հայտնի Կապույտ մզկիթը։

Սոցիալական ցանցերում տարածվել են տեսանյութեր, որոնցում երևում է, թե ինչպես են փրկարարները փլատակների տակից դուրս բերում մարդկանց։ Մի տեսանյութում փրկարարները, ըստ ամենայնի, դիեր են հանում փլատակներից։

Աֆղանստանը գտնվում է սեյսմիկ ակտիվ գոտում և խոցելի է երկրաշարժերի նկատմամբ։ Օգոստոսի վերջին երկրի հարավ-արևելքում տեղի ունեցած երկրաշարժի և ուժեղ հետցնցումների հետևանքով զոհվել էր ավելի քան 2200 մարդ, հազարավոր մարդիկ ստացել էին վնասվածքներ։