Աֆղանստանում անջատել են բջջային կապն ու համացանցը

Աֆղանստանում սեպտեմբերի 29-ից գրեթե ամբողջությամբ դադարեցվել է բջջային հեռախոսակապի և ինտերնետի մատակարարումը։ Այս մասին հայտնում է համացանցի մոնիթորինգով զբաղվող NetBlocks կազմակերպությունը՝ իրավիճակը որակելով որպես «ազգային մակարդակի բլեքաութ»։

NetBlocks-ի տվյալներով՝ կապի զանգվածային անջատումը տեղի է ունեցել տեղական ժամանակով առավոտյան ժամը 8-ին՝ երկրում ինտերնետ հասանելիությունը նվազեցնելով մինչև սովորական մակարդակի 14%-ի։ Կապի խափանումը տեղի է ունեցել այն բանից հետո, երբ թալիբանյան վարչակազմը պատրաստվում էր նշել իրենց իշխանության գալու «հաղթանակի օրը», որի կապակցությամբ նախատեսված էին զորահանդեսներ և այլ միջոցառումներ։

Անջատման պաշտոնական պատճառը դեռևս չի հաղորդվել։ Պաշտոնյաները և երկրի խոշոր հեռահաղորդակցային ընկերությունները՝ Roshan-ը, Afghan Wireless-ը, Etisalat-ը և MTN-ը, առայժմ չեն մեկնաբանել իրավիճակը։

Կապի անջատումը լուրջ մարտահրավեր է դարձել միլիոնավոր աֆղանների համար, որոնք ապավինում էին բջջային կապին և ինտերնետին՝ ընտանիքի անդամների հետ կապ պահպանելու, բիզնես վարելու և տեղեկատվություն ստանալու համար։ Աֆղանստանը, լինելով լեռնային և դժվարանցանելի տեղանք ունեցող երկիր, մեծապես կախված է բջջային կապի ծառայություններից։

Թալիբների՝ 2021 թվականին իշխանության վերադարձից հետո, չնայած նրանց խոստումներին՝ կառավարման ավելի մեղմ մոտեցում ցուցաբերելու վերաբերյալ, շատ աֆղաններ և միջազգային հանրությունը մտահոգված են մարդու իրավունքների և հիմնարար ազատությունների, այդ թվում՝ տեղեկատվության հասանելիության իրավունքի սահմանափակումներով։ Այս զանգվածային անջատումը միայն խորացնում է այդ մտավախությունները՝ երկիրը փաստացի մեկուսացնելով արտաքին աշխարհից։