Աֆղան դեռահասը թռիչքից հետո ողջ է մնացել ինքնաթիռի անիվների խցիկում

Աֆղանստանցի դեռահասը թաքնվել է ինքնաթիռի անիվների խցիկում, 94 րոպե թռիչք է կատարել Կաբուլից Դելի և ողջ է մնացել։ Այդ մասին գրում է The Indian Express-ը: 13-ամյա տղան Կաբուլից ցանկանում էր մեկնել Իրան, ինչի համար եկել էր օդանավակայան և թաքնվել ինքնաթիռի հետևի անիվների մոտ՝ խցիկում: Իր հետ ուներ միայն «փոքր կարմիր աուդիոբարձրախոս»: Պարզվել է, որ ինքնաթիռը, որում թաքնվել էր տղան, ուղևորվում էր Դելի, այլ ոչ թե Թեհրան:

Թռիչքը տևել է ավելի քան 90 րոպե, և տղան ողջ է մնացել: Նրան հայտնաբերել են Ինդիրա Գանդիի անվան օդանավակայանի աշխատակիցները:

Ըստ անվտանգության աշխատակիցների՝ տղային նկատել են օդանավակայանում առավոտյան ժամը 10:20-ին: Երեկոյան դեռահասին հետ են ուղարկել Կաբուլ:

10-11 կմ բարձրության վրա, որտեղ սովորաբար թռչում են ուղևորատար ինքնաթիռները, օդի ջերմաստիճանը իջնում է մինչև -60 °C: Այդ բարձրության վրա նաև թթվածնի պակաս է նկատվում:

Հիշեցնենք, որ նման դեպք արձանագրվել էր նաև 2023 թվականին։ Ալժիրից Փարիզ ժամանած ուղևորատար ինքնաթիռի անիվների խցիկում հայտնաբերել են տղամարդու: Նա ողջ էր, սակայն ծանր վիճակում էր: