Ադրբեջանը ցուցադրել է սերբական Nora-B 52NG հաուբիցները

Ադրբեջանը շարունակում է ակտիվորեն արդիականացնել իր զինված ուժերը՝ համալրելով սպառազինությունը ժամանակակից ռազմական տեխնիկայով։ Այս գործընթացի վերջին վկայությունը դարձել է Բաքվում կայացած շքերթի փորձի ժամանակ նոր հրետանային համակարգերի հրապարակային ցուցադրությունը։

Ռազմական փորձագետների և հանրության ուշադրության կենտրոնում են հայտնվել սերբական արտադրության Nora-B 52NG ինքնագնաց հաուբիցները, որոնք առաջին անգամ են նկատվում Ադրբեջանի զինված ուժերի կազմում։

Այս ժամանակակից հրետանային համակարգերի հայտնվելը Բաքվի փողոցներում հաստատում է 2024 թվականի փետրվարին Ադրբեջանի և սերբական Yugoimport SDPR պետական ընկերության միջև կնքված ռազմական պայմանագրի իրագործումը։ Այդ պայմանագրի համաձայն՝ Բաքուն պետք է ստանար 48 միավոր Nora-B 52NG հաուբից։ Գործարքի ընդհանուր արժեքը կազմում է շուրջ 339 միլիոն դոլար։

Nora-B 52NG-ը համարվում է ժամանակակից անիվավոր ինքնագնաց հրետանային համակարգ, որն աչքի է ընկնում մի շարք տեխնիկական առավելություններով։ Դրանց թվում են բարձր շարժունակությունը, որը թույլ է տալիս արագ փոխել կրակային դիրքերը և խուսափել հակառակորդի պատասխան հարվածներից, ինչպես նաև կրակի բարձր ճշգրտությունն ու հզորությունը։ Այս համակարգերը նախատեսված են հակառակորդի կենդանի ուժի, զրահատեխնիկայի, ամրաշինական կառույցների և այլ կարևոր թիրախների ոչնչացման համար՝ զգալի հեռավորությունների վրա։շ

Ռազմական փորձագետները միակարծիք են, որ այս համակարգերի ինտեգրումն ադրբեջանական բանակին թույլ կտա զգալիորեն ուժեղացնել իր հրետանային ներուժը։