44-օրյա պատերազմի ավարտից 5 տարի անց. հարգանքի տուրք Եռաբլուրում

Նոյեմբերի 9-ին, լրանում է 44-օրյա պատերազմը դադարեցրած եռակողմ հայտարարության ստորագրման հինգերորդ տարելիցը։ Այդ օրը հիշելու և պատերազմի զոհերի հիշատակը հարգելու համար «այսօր վաղ առավոտից սկսվել է մարդկանց հոսքը դեպի «Եռաբլուր» զինվորական պանթեոն»։

Հինգ տարի առաջ՝ 2020 թվականի սեպտեմբերի 27-ին, Ադրբեջանի զինված ուժերը լայնածավալ հարձակողական գործողություններ սկսեցին Արցախի Հանրապետության ուղղությամբ։ 44 օր տևած արյունալի մարտական գործողություններն ընդգրկեցին Արցախի բազմաթիվ քաղաքներ ու բնակավայրեր, որոնք ենթարկվեցին ծանր հրետակոծությունների և անօդաչու թռչող սարքերի հարվածների։ Պատերազմի ընթացքում զոհվեցին հազարավոր զինծառայողներ, զոհեր եղան նաև խաղաղ բնակչության շրջանում։ Առավել կատաղի և ինտենսիվ բախումները տեղի ունեցան հոկտեմբեր և նոյեմբեր ամիսներին, հատկապես Շուշիի և Հադրութի ուղղություններով։

Պատերազմը կանգնեցվեց 2020 թվականի նոյեմբերի 9-ին Հայաստանի, Ադրբեջանի և Ռուսաստանի ղեկավարների միջև ստորագրված եռակողմ հայտարարությամբ, որով հաստատվեց հրադադարի ռեժիմ և զորքերի տեղակայման նոր գծեր։ Այսօր քաղաքացիներն այցելում են Եռաբլուր՝ իրենց խոնարհումը բերելու հանուն հայրենիքի կյանքը զոհաբերած հերոսների հիշատակին։