12-ամյա դադարից հետո ԱՄՆ-ում հաստատվել է ավերիչ EF5 տոռնադո

ԱՄՆ-ի տարածքում արդեն ավելի քան 12 տարի չէր արձանագրվել առավելագույն ուժգնության՝ EF5 կարգի տոռնադո։ Եվ ահա ԱՄՆ-ի Ազգային օդերևութաբանական ծառայությունը վերջերս իրականացրեց բոլոր տվյալների խորքային վերլուծություն հունիսի 20-ին Հյուսիսային Դակոտայի Էնդերլին քաղաքում գրանցված տոռնադոյի վերաբերյալ և բարձրացրեց նրա կատեգորիան մինչև EF5։ Այդ մասին սոցցանցի իր էջում գրել է «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը։ Մասնագետների գնահատմամբ՝ քամու առավելագույն արագությունը հասել է 338 կմ/ժ (94 մ/վ), երբ տոռնադոն անցել է Ռասս և Կասս շրջաններով՝ դառնալով երեք մարդու մահվան պատճառ։

Ինչո՞ւ զեկույցը հրապարակվեց Հյուսիսային Դակոտային տորնադոյի հարվածից գրեթե չորս ամիս անց։ «Ամեն անգամ տոռնադոյի մասին հաղորդագրությունից հետո օդերևութաբանական ծառայությունը դեպքի վայր է ուղարկում օդերևութաբանների խումբ, որը գնահատում է վնասները և որոշում՝ արդյոք դրանք համապատասխանում են տոռնադոյի պատճառած ավերածություններին, և եթե այո՝ ապա, որ կատեգորիային ըստ Ֆուջիտայի սանդղակի։

Այդ գործընթացը հաճախ տևում է մի քանի օր կամ շաբաթ, սակայն երբեմն, ինչպես այս դեպքում, կարող է տևել ամիսներ»,- գրել է Ազիզյանը։ Վերջնական գնահատման համար Ազգային ծառայությունը ներգրավել է ինժեներների և գիտնականների թիմ, որը փաստագրել է, որ երկաթուղային վագոնի մոտ 150 մետր բարձրացում, ինչպես նաև ամբողջությամբ հացահատիկով բեռնված վագոնների շրջում։ Դա համապատասխանում են EF5 կատեգորիայի տոռնադոյի քամու արագությանը։