Լուվրի գողության գործով ձերբակալվել է ևս 5 մարդ

Ֆրանսիայի իրավապահ համակարգը շարունակում է ակտիվ քայլեր ձեռնարկել Փարիզի սրտում տեղի ունեցած և ամբողջ աշխարհը ցնցած հանցագործության բացահայտման ուղղությամբ։ Լուվրի թանգարանից շուրջ 88 միլիոն եվրո արժողությամբ թագավորական զարդերի առևանգման գործով ձերբակալվել է ևս հինգ մարդ։ Այս մասին, հղում անելով Փարիզի դատախազությանը, հայտնում է AFP գործակալությունը՝ նշելով, որ սա վերջին օրերի ընթացքում գործով արձանագրված երկրորդ խոշոր առաջխաղացումն է։

Նոր ձերբակալությունները, ըստ պաշտոնական տեղեկատվության, իրականացվել են Փարիզում և հարակից Սեն-Սեն-Դենի դեպարտամենտում։ Ոստիկանությունը զուգահեռաբար իրականացրել է խուզարկություններ, որոնք, ինչպես գրում է Le Parisien-ը, առայժմ էական արդյունքներ չեն տվել, և գողոնը հայտնաբերել չի հաջողվել։ Սակայն քննության համար կարևոր է այն հանգամանքը, որ, ըստ Le Figaro-ի տվյալների, նոր ձերբակալվածներից մեկը կարող է լինել հոկտեմբերի 19-ի լուսաբացին իրականացված հանդուգն կողոպուտի անմիջական մասնակիցներից։ Քննչական մարմինները ենթադրում են, որ այս կասկածյալի հետքի վրա հնարավոր է եղել դուրս գալ հանցագործության վայրում հայտնաբերված ԴՆԹ հետքերի շնորհիվ։ Ինչ վերաբերում է մյուս չորս ձերբակալվածներին, ապա, դատախազության վարկածով, նրանք կարող են տիրապետել հանցագործության նախապատրաստման և պլանավորման վերաբերյալ արժեքավոր տեղեկությունների։ Սա ամրապնդում է այն վարկածը, որ գործել է լավ կազմակերպված և բազմամարդ հանցավոր խումբ.

Այս իրադարձություններին նախորդել էր անցած հանգստյան օրերին ևս երկու կասկածյալի ձերբակալությունը, որոնք քննության ընթացքում մասնակիորեն ընդունել են իրենց մեղքը։ Քննիչները գրեթե վստահ են, որ գործ ունեն պատվիրված հանցագործության հետ, որի կազմակերպիչը կամ պատվիրատուն դեռևս անհայտ է։

Հիշեցնենք, որ Լուվրի պատմության մեջ ամենախոշոր կողոպուտներից մեկը տեղի էր ունեցել հոկտեմբերի 19-ին։ Հանցագործները, օգտագործելով ապակի կտրող գործիքներ և ամբարձիչ կռունկ, ներթափանցել էին Ապոլլոնի պատկերասրահ, որտեղ ցուցադրվում էին ֆրանսիական թագի պատմական զարդերը։ Նրանք առևանգել էին թանկարժեք ցուցանմուշները և դեպքի վայրից հեռացել մոտոռոլերներով։ Այս դեպքից հետո Լուվրի հավաքածուի մի մասը՝ անվտանգության նկատառումներով, տեղափոխվել է Ֆրանսիայի բանկի պահոց։