Վճարիր, որպեսզի հենվես․ կանադական ավիաընկերությունը ներդրել է նոր վճար

Կանադական WestJet լոուքոսթեր ավիաընկերությունը որոշել է լրացուցիչ վճար գանձել ուղևորներից մի գործառույթի համար, որը մինչ այժմ համարվում էր թռիչքի բազային հարմարավետության անբաժանելի մասը՝ նստատեղի թիկնակը հետ հակելու հնարավորության։ New York Post-ի փոխանցմամբ՝ ավիափոխադրողի կողմից ներկայացված նոր սխեման արդեն իսկ քննադատության մեծ ալիք է բարձրացրել ինչպես ուղևորների, այնպես էլ ոլորտի փորձագետների շրջանում։

Այսուհետ WestJet-ի ինքնաթիռներում կգործի հարմարավետության երեք դաս։ Առաջինը՝ 12 «պրեմիում-նստատեղ», որոնք կունենան կարգավորվող թիկնակ և գլխակալ, և որոնց համար, բնականաբար, պետք է լրացուցիչ վճարել։ Երկրորդ դասը կներառի 36 նստատեղ՝ ոտքերի համար նախատեսված մի փոքր ավելի ընդարձակ տարածքով, սակայն թիկնակը հետ հակելու հնարավորությունն այստեղ բացակայելու է։ Եվ վերջապես, երրորդ՝ ստանդարտ էկոնոմ գոտին, որտեղ ուղևորները ստիպված կլինեն բավարարվել և՛ սահմանափակ տարածությամբ, և՛ անշարժ թիկնակով։

Փորձելով մեղմել սպասվող դժգոհությունը՝ ընկերության ներկայացուցիչ Սամանթա Թեյլորը հայտարարել է, որ նոր սրահը «ստեղծված է՝ հոգ տանելով յուրաքանչյուր բյուջեի մասին» և ուղևորներին առաջարկում է «թռիչքի ժամանակակից փորձառություն»։

Սակայն այս բացատրությունը չի համոզել փորձագետներին։ ՄաքԳիլի համալսարանի ավիացիայի պրոֆեսոր Ջոն Գրադեկը, մեկնաբանելով որոշումը, նշել է.

«Ավիաընկերությունների երևակայությունը չի դադարում զարմացնել ինձ։ Նրանք ինչ-որ կերպ մարդկանց մոտ տպավորություն են ստեղծում, թե վերջիններս ավելին են ստանում՝ ավելի շատ վճարելով։ Բայց այժմ իրավիճակը այլ է. դուք ավելին եք վճարում՝ ստանալու այն, ինչն արդեն ունեցել եք»։

Հարկ է նշել, որ WestJet-ն առաջին ընկերությունը չէ, որը որոշել է գումար խնայել նստատեղերի թիկնակների հաշվին։ Եվրոպայում շատ լոուքոսթերներ, այդ թվում՝ հայտնի Ryanair-ը և EasyJet-ը, վաղուց իրենց ինքնաթիռներում տեղադրել են չկարգավորվող նստատեղեր՝ թռիչքի արժեքը հնարավորինս ցածր պահելու նպատակով։ Այսպիսով, սա համաշխարհային միտում է, որտեղ բազային հարմարավետությունները աստիճանաբար վերածվում են լրացուցիչ վճարովի ծառայությունների։