Վրաստանում ՏԻՄ ընտրություններ են՝ ութ պատգամավորի բոյկոտի ֆոնին

Վրաստանում հոկտեմբերի 4-ին, մեկնարկել են տեղական ինքնակառավարման մարմինների (ՏԻՄ) ընտրությունները։ Իշխող «Վրացական երազանք» կուսակցությունը, սակայն, ցուցադրում է բացարձակ վստահություն իր ուժերի նկատմամբ։ Վարչապետ Իրակլի Կոբախիձեն, քվեարկությունից հետո լրագրողների հետ զրույցում, հայտարարել է, որ իրենց քաղաքական ուժը կհավաքի ձայների ավելի քան 60%-ը և վստահ հաղթանակ կտանի բոլոր 64 համայնքներում։ «Ես քվեարկել եմ մեր երկրի և մեր մայրաքաղաքի խաղաղության, զարգացման և առաջընթացի համար», - նշել է Կոբախիձեն։

Սակայն այս լավատեսական պատկերին հակադրվում է ընդդիմադիր դաշտի մեծ մասի կոշտ դիրքորոշումը։ Ութ առաջատար ընդդիմադիր կուսակցություններ հրաժարվել են մասնակցել քվեարկությանը՝ այն համարելով իշխանության գործողությունները լեգիտիմացնելու փորձ։ Նրանք չեն ճանաչում 2024 թվականի խորհրդարանական ընտրություններից հետո ձևավորված իշխանության օրինականությունը և համոզված են, որ «Վրացական երազանքին» հնարավոր է հաղթել ոչ թե ընտրատեղամասերում, այլ միայն փողոցային պայքարի և բողոքի զանգվածային ակցիաների միջոցով։ Իրենց դիրքորոշումն ամրապնդելու համար բոյկոտ հայտարարած ընդդիմությունը Թբիլիսիի կենտրոնական Ռուսթավելի պողոտայում այսօր երեկոյան ժամը 16:00-ին զանգվածային բողոքի ակցիա է նախապատրաստում։

Հարկ է նշել, որ ընդդիմադիր դաշտում բոյկոտի հարցում միասնականություն չկա։ Որոշ ընդդիմադիր շարժումներ, չհամաձայնելով այս մոտեցման հետ, կոչ են անում իրենց ընտրողներին ներկայանալ ընտրատեղամասեր և քվեաթերթիկի միջոցով արտահայտել իրենց անհամաձայնությունը իշխանությունների քաղաքականության հետ։ Ընդդիմադիր որոշ կուսակցություններ ոչ միայն որոշել են մասնակցել ընտրություններին, այլև նույնիսկ Թբիլիսիում քաղաքապետի պաշտոնի համար առաջադրել են միասնական թեկնածու։

Ընտրությունների նկատմամբ անվստահությունն ավելի է խորանում միջազգային և տեղական դիտորդական առաքելությունների սահմանափակ ներգրավվածության պատճառով։ Եվրոպայի անվտանգության և համագործակցության կազմակերպությունը (ԵԱՀԿ) հայտարարել է, որ իր ներկայացուցիչները չեն դիտարկի քվեարկության ընթացքը՝ պատճառաբանելով, որ պաշտոնական Թբիլիսիից հրավերը չափազանց ուշ են ստացել։ Բացի այդ, բազմաթիվ տեղական դիտորդական կազմակերպություններ նույնպես հրաժարվել են աշխատել ընտրությունների օրը։ Նրանք իրենց որոշումը հիմնավորում են երկրում վերջերս ընդունված սահմանափակող օրենքներով և քաղաքական ճնշումներով, որոնք, ըստ նրանց, անհնար են դարձնում ազատ և արդար ընտրական պայմանների ապահովումը։

Չնայած քաղաքական լարվածությանը՝ ընտրական գործընթացը պաշտոնապես մեկնարկել է։ ՏԻՄ ընտրություններին մասնակցում է 12 կուսակցության կազմում գրանցված ավելի քան 7 հազար թեկնածու։ Ամենաթեժ պայքարը սպասվում է մայրաքաղաք Թբիլիսիում, որտեղ քաղաքապետի պաշտոնի համար պայքարում է 9 թեկնածու։ Ընդհանուր առմամբ, Վրաստանում ընտրելու իրավունք ունի ավելի քան 3,5 միլիոն քաղաքացի, որոնցից մոտ մեկ միլիոնը բնակվում է մայրաքաղաքում։

Քվեարկությունն անցկացվում է 3061 ընտրատեղամասում, որոնք, ըստ Կենտրոնական ընտրական հանձնաժողովի, գրեթե 90 տոկոսով հագեցած են ժամանակակից տեխնոլոգիաներով՝ էլեկտրոնային քվեատուփերով և արձանագրությունների առցանց փոխանցման համակարգով։ Ընտրատեղամասերը բաց են առավոտյան 8-ից մինչև երեկոյան 20:00։ Սակայն այս տեխնիկական պատրաստվածությունը չի կարողանում փարատել քաղաքական անվստահության մթնոլորտը, որը կախված է այսօրվա ընտրությունների վրա՝ դրանք դարձնելով ոչ այնքան ժողովրդավարության դրսևորում, որքան Վրաստանի ներքաղաքական պայքարի հերթական թատերաբեմ։