«Ավտոկրատիայից հինգ պակաս․ ինչպես Վրաստանը շրջվեց Արևմուտքից». Reuters

Վրաստանը սրընթաց սահում է դեպի միակուսակցական կառավարման համակարգ՝ շեղվելով ժողովրդավարական արժեքներից և Արևմուտքի հետ ինտեգրման իր երկարամյա քաղաքականությունից։ Reuters գործակալության հրապարակման համաձայն՝ երկիրը գտնվում է մի կրիտիկական կետում, որից հետո դեպի ժողովրդավարություն վերադարձը կարող է անհնարին դառնալ։

Գործակալությունը նշում է, որ քաղաքական դաշտում իրավիճակը խիստ լարված է։ Ընդդիմադիր ութ առանցքային առաջնորդներից այսօր միայն մեկն է, որ բանտում չէ կամ հետաքննության տակ չի գտնվում։ Ավելին, իշխանությունները պատրաստվում են ամբողջությամբ արգելել երեք հիմնական ընդդիմադիր կուսակցությունների գործունեությունը, ինչը, փաստացի, կվերացնի քաղաքական այլախոհությունը երկրում։

Այս գործընթացները չեն վրիպել միջազգային հանրության ուշադրությունից։ Եվրամիությունն իր վերջին զեկույցում նշել է, որ Վրաստանը «միայն անվանապես է թեկնածու», և Թբիլիսին փաստացի այլևս չի շարժվում դեպի անդամակցություն։ Քաղաքական գործիչներն ու նախկին դիվանագետները տագնապով են արձանագրում, որ երկիրը հասել է անդառնալիության կետի։

Քաղաքական շրջադարձին զուգահեռ փոխվում է նաև երկրի տնտեսական վեկտորը։ Ուղղակի օտարերկրյա ներդրումների ծավալը նվազել է՝ հասնելով 2000-ականների սկզբի մակարդակին։ Խորջրյա նավահանգստի կառուցման ռազմավարական նախագիծը, որը կարևոր նշանակություն ունի երկրի տարանցիկ ներուժի համար, փաստացի կանգ է առել և փոխանցվել չինական ընկերության։ Միևնույն ժամանակ, աճել է կախվածությունը ռուսական էներգակիրներից․ ռուսական նավթի ներկրումը հասել է 45%-ի։

Հատկանշական է, որ այս բացասական միտումների ֆոնին Վրաստանի տնտեսությունը աճ է գրանցում։ Համաշխարհային բանկը այս տարվա համար կանխատեսում է 7% տնտեսական աճ։ Սա, սակայն, հիմնականում պայմանավորված է ռուսական բիզնեսի և ՏՏ մասնագետների զանգվածային ներհոսքով, ինչը երկարաժամկետ կտրվածքում կարող է էլ ավելի խորացնել Վրաստանի կախվածությունը Ռուսաստանից և հեռացնել նրան արևմտյան ուղեծրից։