ԱՄՆ-ը զգուշացնում է. ՌԴ-ն հրթիռներ է կուտակում լայնածավալ գրոհի համար

ԱՄՆ բանակի նախարար և նոր բանակցող Դեն Դրիսկոլը եվրոպացի դիվանագետների հետ հանդիպմանը հանդես է եկել մտահոգիչ նախազգուշացմամբ։ Նա հայտարարել է, որ Ռուսաստանը փոխել է իր ռազմավարությունը և սկսել է մեծ քանակությամբ հրթիռներ կուտակել։ Ինչպես նշում է The New York Times-ը, ամերիկացի բարձրաստիճան պաշտոնյան Մոսկվայի կողմից եկող այս աճող սպառնալիքն օգտագործել է որպես ծանրակշիռ փաստարկ՝ խաղաղության արագ համաձայնագիր կնքելու անհրաժեշտությունը հիմնավորելու համար, նույնիսկ եթե այդ համաձայնագիրը ձեռնտու չլինի պաշտոնական Կիևին։

Տարիներ շարունակ ուկրաինական ճակատում գործում էր յուրահատուկ հաշվեկշիռ՝ Մոսկվան հակառակորդի ուղղությամբ արձակում էր մոտավորապես այնքան հրթիռ, որքան հասցնում էր արտադրել այդ ընթացքում։ Սակայն այժմ պատկերը կտրուկ փոխվել է։ Արևմտյան պաշտոնյաների փոխանցմամբ՝ Դրիսկոլը ներկաներին տեղեկացրել է, որ Ռուսաստանը ներկայումս մեծացնում է իր ռազմական ներուժը՝ նպատակ ունենալով ստեղծել հեռահար զենքի զգալի պաշար։ Ամերիկյան կողմի այս գնահատականը, որը ազդանշան է Ռուսաստանի պաշտպանական արդյունաբերության մեջ տեղի ունեցող կարևոր տեղաշարժի մասին, հաստատվում է նաև ուկրաինացի զինվորականների տվյալներով և անկախ վերլուծաբանների հաշվարկներով։

Դրիսկոլի ուղերձի հիմնական մեխը և ակնարկը եղել են չափազանց հստակ՝ անհրաժեշտ է հասնել հակամարտության շուտափույթ կարգավորման։ Ըստ բանակցողի՝ հապաղումը հղի է լրջագույն հետևանքներով, քանի որ հրթիռային աճող վտանգը կարող է ջախջախիչ հարված հասցնել Ուկրաինային և նույնիսկ դուրս գալ նրա սահմաններից։

Վերլուծաբանները նախազգուշացնում են, որ կուտակված հսկայական զինանոցը Ռուսաստանը կարող է օգտագործել Ուկրաինայի՝ առանց այն էլ վնասված էներգետիկ ենթակառուցվածքները վերջնականապես ոչնչացնելու համար։ Նման մասշտաբային գրոհները կհանգեցնեն Ուկրաինայի հակաօդային պաշտպանության համակարգերի հրթիռների արագ սպառմանը՝ պաշտպանությունից զրկելով ռազմավարական նշանակություն ունեցող տարածքները, մասնավորապես՝ Կիևը։ Ավելին, փորձագետները չեն բացառում, որ Մոսկվան կարող է հրթիռային կամ անօդաչու թռչող սարքերի հարվածներով սպառնալ նաև եվրոպական երկրներին։

Թեև մասնագետները քիչ հավանական են համարում, որ պատերազմի ավարտի դեպքում անգամ Ռուսաստանը զգալիորեն կկրճատի զենքի արտադրությունը, սակայն հակամարտության դադարեցումը կարող է ռազմավարական նշանակություն ունենալ։ Այն կարող է Մոսկվային զրկել եվրոպական այլ երկրի վրա հրթիռներ կամ անօդաչուներ արձակելու պոտենցիալ արդարացումից՝ կանխելով հակամարտության աշխարհագրական ընդլայնումը։