Թրամփի բանագնացը Պուտինին կներկայացնի Ուկրաինայի խաղաղության ծրագիրը

Սպիտակ տան մամուլի քարտուղարը հաստատել է, որ Ուիթքոֆն արդեն Մոսկվայում է։ Սպասվում է, որ Դոնալդ Թրամփի հատուկ բանագնացն այսօր հանդիպում կունենա ՌԴ նախագահ Վլադիմիր Պուտինի հետ։ Հանդիպման առանցքում լինելու է խաղաղության ծրագրի ներկայացումը, որը, ըստ պաշտոնական Վաշինգտոնի, նախապես համաձայնեցվել է Կիևի իշխանությունների հետ։

Ուկրաինական ճգնաժամի հանգուցալուծմանն ուղղված Միացյալ Նահանգների նախագահ Դոնալդ Թրամփի ջանքերը լուրջ մտահոգություններ են առաջացրել Հին աշխարհում։ Հեղինակավոր The Wall Street Journal պարբերականը ծավալուն վերլուծությամբ անդրադարձել է ստեղծված իրավիճակին՝ ընդգծելով, որ Վաշինգտոնի քայլերը սպառնում են ոչ միայն եվրոպական անվտանգության ճարտարապետությանը, այլև հարցականի տակ են դնում Հյուսիսատլանտյան դաշինքի՝ ՆԱՏՕ-ի ապագան։

Ըստ ամերիկյան պարբերականի՝ եվրոպական մայրաքաղաքներն այսօր հայտնվել են յուրօրինակ մեկուսացման մեջ։ Դա պայմանավորված է այն հանգամանքով, որ ամերիկյան կողմը աստիճանաբար, բայց հետևողականորեն հեռանում է տարածաշրջանից՝ Եվրոպային թողնելով միայնակ իր անվտանգային խնդիրների հետ։ Ստեղծված իրողությունը եվրոպացիներին ստիպում է վերանայել իրենց ռազմավարությունը և ավելի մեծ չափով հենվել սեփական ուժերի վրա։

Հոդվածում ուշագրավ դիտարկումներ են արվում ԱՄՆ-ի կողմից առաջարկված խաղաղության ծրագրի մանրամասների վերաբերյալ։ Շատերի մոտ այն տպավորությունն է, որ Թրամփի վարչակազմի առաջնահերթությունները փոխվել են։ Այժմ Սպիտակ տունն ավելի շատ շահագրգռված է Ռուսաստանի հետ տնտեսական համագործակցության վերականգնմամբ և կապերի բարելավմամբ, քան տրանսատլանտյան դաշինքի շահերի պաշտպանությամբ։ Սա լուրջ ազդակ է դաշնակիցների համար, որոնք տարիներ շարունակ ապավինել են ամերիկյան հովանուն։

Ֆրանսիացի բարձրաստիճան պաշտոնյաներից մեկը, անանուն մնալու պայմանով, իր մտավախությունն է հայտնել առ այն, որ ԱՄՆ-ի՝ ՆԱՏՕ-ից հեռանալու միտումը կասկածի տակ է դնում դաշինքին նրանց նվիրվածությունը։ Եվրոպայի համար խիստ անշահավետ և վտանգավոր սցենար է համարվում Դոնալդ Թրամփի և Վլադիմիր Պուտինի հնարավոր փոխգործակցությունը, եթե դա տեղի ունենա առանց հաշվի առնելու եվրոպական երկրների կենսական շահերը։

Այս աշխարհաքաղաքական տեղաշարժերի ֆոնին ուշագրավ է Սպիտակ տան հատուկ բանագնաց Սթիվ Ուիթքոֆի ակտիվությունը։ Ինչպես հայտնում է The Wall Street Journal-ը, Ուիթքոֆն այս տարվա ընթացքում արդեն վեցերորդ անգամ է մեկնում Մոսկվա՝ խաղաղության ծրագիրը քննարկելու նպատակով։ Հատկանշական է փաստը, որ նրա ծրագրերում Կիև այցելություն նախատեսված չէ։ Սա ևս մեկ անգամ հաստատում է այն վարկածը, որ հակամարտության կարգավորման շուրջ առանցքային բանակցություններն ընթանում են ուղիղ ձևաչափով՝ Միացյալ Նահանգների և Ռուսաստանի միջև։