Թրամփը չեղարկել է Բայդենի «ավտոստորագրությամբ» փաստաթղթերը

ԱՄՆ նախագահ Դոնալդ Թրամփը հանդես է եկել աննախադեպ հայտարարությամբ՝ իրավական ուժից զրկելով նախորդ վարչակազմի օրոք ընդունված փաստաթղթերի զգալի մասը։ Նախագահի որոշմամբ՝ առոչինչ են ճանաչվել Ջոզեֆ Բայդենի պաշտոնավարման ընթացքում ստորագրված բոլոր այն պաշտոնական թղթերը, որոնք վավերացվել են ոչ թե անձամբ նախագահի ձեռքով, այլ ավտոմատ ստորագրման համակարգի՝ այսպես կոչված «ավտոստորագրության» (autopen) կիրառմամբ։

Հրապարակված պաշտոնական տեքստում հստակ սահմանվում է չեղարկման ենթակա ակտերի շրջանակը։ Ըստ այդմ՝ անվավեր և իրավաբանական ուժ չունեցող են հայտարարվում բացարձակապես բոլոր հռչակագրերը, գործադիր հրամանները, հուշագրերն ու պայմանագրերը, որոնք ստորագրվել են Բայդենի վարչակազմի հրամանով՝ այդ, ինչպես նշվում է հայտարարության մեջ, «տխրահռչակ և չարտոնված» մեթոդով։

Այս որոշումը լուրջ և անմիջական հետևանքներ է ունենալու նաև բազմաթիվ անհատների համար։ Հատուկ ուշադրություն է դարձվել ներումներին և պատժի մեղմացումներին։

Պաշտոնական հայտարարությամբ ծանուցվում է, որ յուրաքանչյուր ոք, ով ստացել է ներման, պատժի կրճատման մասին որոշում կամ ցանկացած այլ իրավական փաստաթուղթ՝ վավերացված ավտոստորագրությամբ, պետք է ի գիտություն ընդունի, որ այդ փաստաթղթերը լիովին և վերջնականապես անվավեր են հռչակված։