Սաուդյան Արաբիայի թագաժառանգին ԱՄՆ-ում սպասում են կարմիր գորգով

ԱՄՆ նախագահ Դոնալդ Թրամփը պատրաստվում է կարմիր գորգով դիմավորել Սաուդյան Արաբիայի փաստացի ղեկավար, թագաժառանգ արքայազն Մուհամմեդ բեն Սալմանին։ Այցը, որը նախատեսված է երեքշաբթի, ունի հավակնոտ օրակարգ՝ F-35 կործանիչների վաճառքի առաջխաղացում և թագավորության հետ բազմաթիվ գործարար համաձայնագրերի կնքում։ Այս մասին հայտնում է Reuters գործակալությունը։

Սա թագաժառանգի առաջին այցն է ԱՄՆ 2018 թվականին Ստամբուլում սաուդցի գործակալների կողմից լրագրող Ջամալ Խաշոգջիի սպանությունից հետո, որն առաջացրել էր բողոքի և դատապարտման ալիք միջազգային ասպարեզում։ Ամերիկյան հետախուզությունը եզրակացրել էր, որ Մուհամմեդ բեն Սալմանն է հավանություն տվել Խաշոգջիի սպանությանը։

Թեև թագաժառանգը հերքել է անմիջական հրաման տալու մեղադրանքը, նա ընդունել է իր պատասխանատվությունը՝ որպես թագավորության փաստացի ղեկավար։ Վաշինգտոնում նախատեսված ջերմ ընդունելությունը վկայում է այն մասին, որ երկու երկրների հարաբերությունները վերականգնվել են Խաշոգջիի սպանությունից հետո առաջացած խորը ճգնաժամից։

Այցի ընթացքում նախատեսված են բանակցություններ Թրամփի հետ Օվալաձև աշխատասենյակում, ճաշ կառավարության սենյակում և պաշտոնական ընթրիք։ Թրամփը հույս ունի կյանքի կոչել մայիսին իր՝ թագավորություն կատարած այցի ժամանակ Սաուդյան Արաբիայի կողմից խոստացված 600 միլիարդ դոլարի ներդրումային ծրագիրը։ Սպիտակ տան բարձրաստիճան պաշտոնյան Reuters-ին հայտնել է, որ ակնկալվում են գործարքներ տեխնոլոգիաների, արտադրության, պաշտպանության և այլ ոլորտներում։

Կենտրոնական թեմաներից է 48 միավոր F-35 կործանիչների վաճառքը։ «Մենք կվաճառենք F-35-ներ Սաուդյան Արաբիային», - երկուշաբթի օրը հայտարարել է Թրամփը։ Սա կլինի ամերիկյան առաջադեմ կործանիչների առաջին վաճառքը թագավորությանը և կարող է փոխել ռազմական հավասարակշռությունը Մերձավոր Արևելքում՝ ստուգելով Վաշինգտոնի հանձնառությունը Իսրայելի «որակական ռազմական առավելության» պահպանման հարցում։

Բացի ռազմական տեխնիկայից, սաուդյան առաջնորդը ձգտում է ստանալ անվտանգության երաշխիքներ, արհեստական բանականության տեխնոլոգիաների հասանելիություն և առաջընթաց քաղաքացիական միջուկային ծրագրի շուրջ համաձայնագրում։

Թրամփը նաև մտադիր է ճնշում գործադրել թագաժառանգի վրա՝ Իսրայելի հետ հարաբերությունները կարգավորելու և «Աբրահամյան համաձայնագրերին» միանալու համար։ Սաուդյան Արաբիան մինչ այժմ դժկամությամբ է մոտեցել այս հարցին՝ պահանջելով Պաղեստինի պետականության հստակ հեռանկար։ Այնուամենայնիվ, Թրամփը Սաուդյան Արաբիայի միացումը համարում է Մերձավոր Արևելքում ավելի լայն խաղաղության հասնելու առանցքային օղակը։

Փորձագետների կարծիքով, այցի հիմնական նպատակներից է նաև Սաույան Արաբիային Չինաստանի ազդեցության ոլորտից հեռու պահելը՝ ամրապնդելով նրա կապերը ԱՄՆ-ի հետ անվտանգության, ֆինանսների և էներգետիկայի ոլորտներում։