Իսրայելը և ՀԱՄԱᲡ-ը սկսել են գերիների փոխանակումը

Ուրբաթ օրը ուժի մեջ մտած հրադադարի համաձայնագրից հետո Իսրայելը սկսել է պաղեստինցի բանտարկյալների փոխանակման գործընթացը՝ ՀԱՄԱՍ-ի կողմից պահվող իսրայելցի պատանդների դիմաց։ Իսրայելական աղբյուրները հոկտեմբերի 11-ին հաստատել են, որ համապատասխան մարմինները սկսել են իսրայելական բանտերից պաղեստինցի բանտարկյալների տեղափոխումը, հաղորդում է «Yedioth Ahronoth»-ը։

Գործընթացը մեկնարկել է այն բանից հետո, երբ լրացել է ԱՄՆ նախագահ Դոնալդ Թրամփի կողմից առաջարկված ծրագրով սահմանված 72-ժամյա վերջնաժամկետը։ Համաձայնագրի համաձայն, որը կնքվել է Եգիպտոսի Շարմ էլ Շեյխ քաղաքում միջնորդների մասնակցությամբ անուղղակի բանակցությունների արդյունքում, ՀԱՄԱՍ-ը պետք է 72 ժամվա ընթացքում ազատ արձակի Գազայում մնացած 20 ողջ իսրայելցի պատանդներին։ Ի պատասխան՝ Իսրայելը կազատի իսրայելական բանտերում երկարատև պատիժ կրող 250 պաղեստինցու։ Այս թիվը չի ներառում պատերազմի ընթացքում Գազայում ձերբակալված ևս 1700 պաղեստինցիներին։

Իր հերթին, ՀԱՄԱՍ-ը սկսել է «մնացած իսրայելցի պատանդներին» նախապատրաստել երկուշաբթի օրը նախատեսված ազատ արձակմանը։ Սակայն իրավիճակը բարդանում է նրանով, որ Գազայում դեռևս 48 պատանդ կա, որոնցից միայն 20-ն են ողջ։ 26-ը համարվում են մահացած, իսկ երկու դիակ՝ անհետ կորած։ Իսրայելի վարչապետ Բենիամին Նեթանյահուն վերջին օրերին բազմիցս ընդգծել է, որ իրենք հետ են բերելու բոլոր «պատանդներին՝ մահացածներին ու ողջերին»։ ՀԱՄԱՍ-ի առաջնորդները նշել են, որ դիակների տեղափոխումը որոշ ժամանակ կպահանջի։

Իսրայելի արդարադատության նախարարությունը հրապարակել է ազատ արձակման ենթակա 250 պաղեստինցի բանտարկյալների անվանական ցուցակը։ Սակայն ուշագրավ է, որ այդ ցուցակում չեն ընդգրկվել մի շարք հայտնի պաղեստինցի առաջնորդներ, որոնց ազատ արձակումը պահանջում էր ՀԱՄԱՍ-ը, ինչպիսիք են ՖԱԹՀ-ի առաջնորդ Մարվան Բարգուտին և Պաղեստինի ազատագրման ժողովրդական ճակատի գլխավոր քարտուղար Ահմեդ Սաադաթը։

Գործընթացը կիրականացվի խիստ պայմաններում։ Ինչպես գրում է Al Arabiya-ն, փոխանակումը տեղի կունենա առանց զանգվածային լրատվամիջոցների ուղիղ լուսաբանման, ինչպես նաև առանց զինված կամ տոնական ցույցերի, որոնք ուղեկցել են նախորդ նմանատիպ գործարքները։ Գործողության ընթացքին կհետևի միայն Կարմիր Խաչը, որը կզեկուցի հնարավոր խախտումների մասին։