Շվեդիայում ձկնորսը միջնադարյան գանձ է հայտնաբերել

Շվեդիայում ձկնորսության պատրաստվող մի տղամարդ անսպասելիորեն դարձել է կարևոր հնագիտական հայտնագործության հեղինակ։ Ստոկհոլմի մերձակայքում գտնվող իր ամառանոցի մոտ որդեր փորելիս նա պատահաբար հանդիպել է ժանգոտ մետաղյա կճուճի, որը լի էր արծաթով։ Կճուճի ներսում եղել են զարդեր և հազարավոր մետաղադրամներ, իսկ գտածոյի ընդհանուր քաշը կազմել է մոտ վեց կիլոգրամ։

Հնագետները պարզել են, որ մետաղադրամները հատվել են 12-րդ դարի երկրորդ կեսին Շվեդիան կառավարած Կնուտ Էրիկսոն թագավորի օրոք։ Դրանց վրա հնարավոր է տարբերակել «KANUTUS» գրությունը։ Փորձագետների կարծիքով՝ գանձը թաղվել է մոտավորապես 12-րդ դարում, այսինքն՝ շատ ավելի վաղ, քան հենց Ստոկհոլմի հիմնադրումը, որը տեղի է ունեցել միայն 1252 թվականին։

Ստոկհոլմի վարչակազմի ներկայացուցիչ Սոֆյա Անդերսոնը հայտարարել է, որ «սա, հավանաբար, Շվեդիայում երբևէ հայտնաբերված միջնադարյան ամենախոշոր արծաթե գանձերից մեկն է»։ Նրա խոսքով՝ կճուճում եղել է շուրջ 20 հազար մետաղադրամ, ինչպես նաև հազվագյուտ «եպիսկոպոսական» դրամներ, որոնք հատվել են եկեղեցականների կողմից։

Պատմաբանները ենթադրում են, որ գանձը կարող էր թաքցված լինել շվեդական ազնվական ընտանիքների միջև տեղի ունեցած քաղաքական խռովությունների և պատերազմների ժամանակաշրջանում։

Այժմ գանձը գտնվում է մասնագետների մոտ, որոնք զբաղվում են դրա մաքրմամբ և կատալոգիզացմամբ։ Իշխանությունները որոշում են, թե որ թանգարանին կարելի է հանձնել գտածոն, իսկ այն հայտնաբերողին կվճարվի փոխհատուցում։