ԱՄՆ-ն Ֆիլիպիններում հրթիռներ է տեղակայում Չինաստանին զսպելու համար

ԱՄՆ-ն, ի պատասխան Չինաստանի ռազմածովային հզորության աճի, ուժեղացնում է իր ռազմական ներկայությունը Խաղաղ օվկիանոսի առանցքային նշանակություն ունեցող ջրային ուղիներում։ Վաշինգտոնի ռազմավարության կենտրոնում Բաշի անցուղին է՝ Ֆիլիպինների և Թայվանի միջև գտնվող ռազմավարական նշանակության անցումը, որը Հարավչինական ծովը միացնում է Խաղաղ օվկիանոսին։

Այս ռազմավարության շրջանակներում ԱՄՆ-ն զորքեր և հականավային հրթիռային համակարգեր է տեղակայում Ֆիլիպինների հյուսիսային կղզիներում՝ Թայվանից ընդամենը 150 կմ հեռավորության վրա գտնվող Բատանես նահանգում։ Ֆիլիպինների հետ անցկացվող գրեթե շարունակական զորավարժությունների նպատակն է մշակել Բաշի նեղուղին արգելափակելու սցենարներ՝ Թայվանի վրա Պեկինի հնարավոր հարձակման դեպքում։ Ինչպես նշել է Ֆիլիպինների նախկին ռազմական ղեկավարներից մեկը, «անհնար է ներխուժել Թայվան՝ առանց վերահսկելու Ֆիլիպինների հյուսիսը»։

Այս տարվա ապրիլ-հունիս ամիսներին անցկացված զորավարժությունների ընթացքում ամերիկյան ուժերը երկու անգամ հականավային հրթիռային կայաններ են տեղափոխել տարածաշրջան։ Ավելին, անցյալ տարի ԱՄՆ բանակը Բատանեսից հարավ գտնվող Լուսոն կղզում տեղակայել էր նորագույն «Typhon» կայաններ, որոնք զինված են մինչև 1600 կմ հեռահարության «Թոմահավկ» հրթիռներով՝ թիրախավորելով նաև Չինաստանի տարածքում գտնվող օբյեկտները։

Այս գործողությունները Պենտագոնի ավելի լայն ռազմավարության մի մասն են, որի նպատակն է օգտագործել Ֆիլիպինյան արշիպելագի աշխարհագրական դիրքը՝ զսպելու Չինաստանի ցանկացած ագրեսիա Թայվանի կամ Հարավչինական ծովի վիճելի տարածքների նկատմամբ։ Ֆիլիպինները, որը բաղկացած է ավելի քան 7600 կղզիներից, կարևոր օղակ է այսպես կոչված «Առաջին կղզիների շղթայում», որը ձգվում է Ճապոնիայից մինչև Բորնեո։

Ամերիկյան զորավարժությունները անհանգստություն են առաջացրել Բատանեսի շուրջ 20,000 բնակիչների շրջանում, ովքեր մտավախություն ունեն, որ իրենց խաղաղ կղզիները կարող են հայտնվել ԱՄՆ-ի և Չինաստանի միջև հնարավոր հակամարտության առաջնագծում։ Պեկինը խիստ է արձագանքել այս զորավարժություններին՝ զգուշացնելով, որ դրանք «չափազանց վտանգավոր» են, և պահանջելով հեռացնել հրթիռային կայանները։