ԱՄՆ-ը կսկսի փակել վենեսուելական նարկոթրաֆիկի ցամաքային ուղին․ Թրամփ

Միացյալ Նահանգների և Վենեսուելայի միջև լարվածությունը թևակոխում է նոր՝ առավել վճռական փուլ։ ԱՄՆ նախագահ Դոնալդ Թրամփը հայտարարել է, որ Վաշինգտոնը մտադիր է արմատապես փոխել թմրամիջոցների ապօրինի շրջանառության դեմ պայքարի մարտավարությունը՝ ծովային գործողություններից անցում կատարելով նաև ցամաքային հատվածներին։ Ամերիկյան առաջնորդի խոսքով՝ Միացյալ Նահանգները «շատ շուտով» կսկսի կոնկրետ գործողություններ իրականացնել՝ ուղղված վենեսուելացի կասկածյալ նարկոթրաֆիկինգով զբաղվողների ցամաքային երթուղիների արգելափակմանը։ Այս մասին Դոնալդ Թրամփը հայտնել է Գոհաբանության օրվա առթիվ ամերիկացի զինվորականներին ուղղված իր ուղերձում։ Նախագահը մանրամասնել է վերջին շաբաթների ընթացքում կատարված աշխատանքի ծավալները՝ ընդգծելով, որ ամերիկյան զինուժին հաջողվել է զգալիորեն զսպել վենեսուելական նարկոկարտելների գործունեությունը։

Ըստ Թրամփի՝ ծովային ճանապարհով թմրանյութերի տեղափոխումը գրեթե ամբողջությամբ կասեցվել է, ինչը ստիպում է հանցավոր խմբավորումներին փնտրել այլ ուղիներ։

«Վերջին շաբաթներին դուք աշխատել եք վենեսուելացի նարկոթրաֆիկինգով զբաղվողներին զսպելու ուղղությամբ, որոնք, ինչպես գիտեք, շատ են։ Իհարկե, հիմա ծովով նրանցից շատերը չեն գալիս, դուք հավանաբար նկատել եք դա, շնորհիվ այն բանի, որ մենք փակել ենք նրանց թույների ճանապարհը, որոնք ուղղվում էին դեպի ԱՄՆ և տարեկան հարյուր հազարավոր մարդկանց սպանում»,- նշել է Սպիտակ տան ղեկավարը։

Նախագահը ներկայացրել է նաև տպավորիչ վիճակագրություն՝ փաստելով, որ ծովային ուղղությունը փակվել է մոտ 85 տոկոսով։ «Մենք պատրաստվում ենք լուծել այս իրավիճակը։ Մենք արդեն շատ բան ենք անում։ Մենք գրեթե կանգնեցրել ենք, 85%-ով փակել ենք ծովային ուղղությունը։ Դուք հավանաբար նկատել եք, որ հիմա նրանք չեն ձգտում թմրանյութեր մատակարարել ծովով, և շուտով մենք կսկսենք փակել նրանց ճանապարհը ցամաքով»,- հավելել է նա։

Հարկ է նշել, որ իրավիճակը տարածաշրջանում սրվել է դեռևս սեպտեմբեր ամսից, երբ Միացյալ Նահանգները սկսեց պարբերաբար հարվածներ հասցնել Կարիբյան ծովում գտնվող վենեսուելական նավերին՝ նրանց մեղադրելով թմրանյութերի տեղափոխման մեջ։ Այս գործողությունները խիստ արձագանք են գտել Կարակասում։ Վենեսուելայի նախագահ Նիկոլաս Մադուրոն կտրականապես դատապարտել է ԱՄՆ-ի քայլերը՝ ամերիկյան գործողությունները որակելով ապօրինի։ Ավելին, Մադուրոն պնդում է, որ թմրամիջոցների դեմ պայքարի անվան տակ Վաշինգտոնը փորձում է իրականացնել քաղաքական նպատակներ՝ մասնավորապես, տապալել Վենեսուելայի գործող իշխանությունը։

Ռազմավարական այս նոր մոտեցման մասին ավելի վաղ՝ նոյեմբերի 14-ին, ազդարարել էր նաև Պենտագոնի ղեկավար Փիթ Հեգսեթը։ Նա պաշտոնապես հայտարարել էր Արևմտյան կիսագնդում նարկոկարտելների դեմ ուղղված «Հարավային նիզակ» (Southern Spear) հատուկ գործողության մեկնարկի մասին։ Թրամփի վերջին հայտարարությունները գալիս են փաստելու, որ «Հարավային նիզակը» սահմանափակված չէ միայն ծովային տիրույթով և մոտ ապագայում ընդգրկելու է նաև լայնածավալ ցամաքային գործողություններ, ինչը կարող է էլ ավելի սրել առանց այն էլ պայթյունավտանգ իրավիճակը տարածաշրջանում։