Ուկրաինան դրոն-կործանիչ է տպում՝ 3D տպիչով

Ուկրաինական SkyFall ընկերությունը, որը հայտնի է Vampire և Shrike FPV մարտական անօդաչուների արտադրությամբ, Դուբայի միջազգային ավիասալոնում առաջին անգամ հանրությանը ներկայացրել է իր նորագույն մշակումը՝ P1-Sun անվանումով դրոն-կործանիչի իրական չափի մոդելը։ Այս մասին, ինչպես հաղորդում է Bloomberg գործակալությունը, հայտնել են ընկերության ներկայացուցիչները։

Նոր ԱԹՍ-ն ունի մոդուլային կառուցվածք, իսկ դրա կմախքը ամբողջությամբ ստեղծվել է 3D տպագրության տեխնոլոգիայով, ինչը զգալիորեն արագացնում և պարզեցնում է արտադրական գործընթացը։ Այն FPV տիպի կործանիչ է, որը օպերատորին թույլ է տալիս կառավարել այն իրական ժամանակում՝ տեսնելով թռիչքը դրոնի «աչքերով»։ Ըստ մշակողների՝ P1-Sun-ը կարող է զարգացնել մինչև 300 կմ/ժ արագություն և բարձրանալ մինչև 5000 մետր, ինչը նրան դարձնում է արդյունավետ միջոց օդային թիրախների դեմ պայքարում։

Նշվում է, որ P1-Sun-ը նախագծվել է՝ հաշվի առնելով ռուսական «Գերան-2» (Շահեդ) հարվածային անօդաչուները որսալու և ոչնչացնելու ուկրաինական զորքերի ձեռք բերած մարտական փորձը։ SkyFall ընկերությունում նաև հայտարարել են, որ այս կործանիչները կարող են հաջողությամբ կիրառվել նաև ուղղաթիռների դեմ։ Ընկերության պնդմամբ՝ P1-Sun-ն արդեն իսկ արտադրվում է ամսական «հազարավոր» միավորի չափով։