Պուտինը խոստանում է Ռուսաստանը դարձնել «խաղաղ ատոմի լոկոմոտիվ»

Մոսկվայում ընթացող «Համաշխարհային ատոմային շաբաթ» միջազգային ֆորումի ընթացքում Ռուսաստանի նախագահ Վլադիմիր Պուտինը հանդես է եկել ծրագրային ելույթով՝ ներկայացնելով ատոմային էներգետիկայի զարգացման ռուսական տեսլականը և ոլորտում Մոսկվայի ռազմավարական նպատակները։ Ելույթի սկզբում ՌԴ նախագահը նշել է, որ աշխարհը թևակոխում է նոր տեխնոլոգիական դարաշրջան, որի բնորոշ գծերից է էլեկտրաէներգիայի սպառման կտրուկ աճը, մասնավորապես՝ տվյալների մշակման կենտրոնների (դատա-կենտրոնների) կողմից։

Նրա կանխատեսմամբ՝ առաջիկա տասնամյակում դրանց էներգիայի սպառումը կավելանա ավելի քան երեք անգամ։ Այս մարտահրավերին ի պատասխան՝ Ռուսաստանն արդեն իսկ իրականացնում է նորարարական նախագծեր՝ ստեղծելով դատա-կենտրոններ անմիջապես իր ատոմային էլեկտրակայանների (ԱԷԿ) տարածքում։ Պուտինը նաև ընդգծել է, որ հասարակության մեջ աստիճանաբար ամրապնդվում է ընկալումը, որ ատոմային էներգետիկան էկոլոգիապես մաքուր տեխնոլոգիա է, ինչը, զարգացման կարիքների հետ մեկտեղ, խթանում է խաղաղ ատոմի նկատմամբ պահանջարկը։ Նրա խոսքով՝ այս պահանջարկի հիմնական աճը կապահովեն Գլոբալ Հարավի և Արևելքի երկրները, որոնք ատոմային էներգիան դիտարկում են որպես իրենց զարգացման կարևորագույն ռեսուրս։

Այդ հարցում Մոսկվան պատրաստ է օժանդակել, հայտարարել է Պուտինը։ Անդրադառնալով Ռուսաստանի տեխնոլոգիական ներուժին՝ նա առանձնացրել է մի քանի առանցքային ուղղություն։ Ռուսաստանը շուտով կսկսի լողացող ԱԷԿ-ների սերիական արտադրություն։ Սա թույլ կտա էներգիա մատակարարել հեռավոր և դժվարամատչելի շրջաններին՝ ապահովելով էներգետիկ ճկունություն։ Սակայն ամենահավակնոտ հայտարարությունը վերաբերում էր միջուկային վառելիքի խնդրին։

Պուտինը հատուկ ուշադրություն է դարձրել միջազգային համագործակցության ռուսական մոդելին՝ այն հակադրելով, իր բնորոշմամբ, «տեխնոլոգիական գաղութատիրությանը»։ Նա ընդգծել է, որ Ռուսաստանը խստորեն կատարում է իր բոլոր պայմանագրային պարտավորությունները և իր գործընկերներին կախվածության մեջ չի դնում իր տեխնիկական լուծումներից։

«Հավասար հասանելիությունը խաղաղ ատոմի տեխնոլոգիաներին կօգնի ապահովել կայուն գլոբալ զարգացում», - հայտարարել է նա՝ հավելելով, որ Ռուսաստանը հետաքրքրված է երկարաժամկետ նախագծերով։ Իր խոսքում Ռուսաստանի նախագահը որպես բացարձակ գերակայություն է նշել միջուկային օբյեկտների անվտանգության ապահովումը՝ «որտեղ էլ որ դրանք գտնվեն»։ Նա կոչ է արել շարունակաբար բարձրացնել անվտանգության պահանջները ատոմային ցիկլի բոլոր փուլերում՝ ուրանի արդյունահանումից մինչև ռեակտորների շահագործում։

Ելույթի վերջում Վլադիմիր Պուտինը բաց հրավեր է հղել տարբեր երկրների գիտնականներին՝ համագործակցելու այն տեխնոլոգիաների շուրջ, որոնք, նրա խոսքով, «նոր դարաշրջան են բացում ատոմային էներգետիկայում»։