Եվրոպան թույլ է և անտեղի․ Նեթանյահու

Իսրայելի վարչապետ Բենիամին Նեթանյահուն Euronews-ին տված բացառիկ հարցազրույցում հանդես է եկել Եվրոպայի հասցեին խիստ քննադատությամբ՝ հայտարարելով, որ Եվրոպան, ըստ էության, կորցրել է իր դերակատարությունն ու կարևորությունը համաշխարհային քաղաքականության մեջ։ Նրա խոսքով՝ Եվրոպան բացակայում է Իսրայելի և «ՀԱՄԱՍ»-ի միջև հրադադարի հաստատման գործընթացից, քանի որ «ըստ էության, տեղի է տվել պաղեստինյան ահաբեկչությանը և իր երկրներում գործող ծայրահեղական իսլամիստական փոքրամասնություններին»։

«Ահա թե ինչու Եվրոպան, ըստ էության, դարձել է անտեղի և ցուցաբերել է հսկայական թուլություն», - նշել է Նեթանյահուն։ Նա ընդգծել է, որ հենց ԱՄՆ նախագահ Դոնալդ Թրամփն է ստանձնել առաջնորդությունը և հանդես եկել հրադադարի «իրատեսական» գործարքի նախաձեռնությամբ։

Նեթանյահուն խստորեն դատապարտել է ԵՄ 27 անդամ երկրներից 15-ի՝ Պաղեստինի պետությունը ճանաչելու որոշումը՝ այն անվանելով «իսլամիստների համար բարձրագույն պարգև»։ «Նրանք (եվրոպացիները) ըստ էության ասացին՝ եկեք նրանց պարզապես տանք պաղեստինյան պետություն, որը կլինի վերջնական պարգև «Համասի» համար՝ Հոլոքոստից ի վեր հրեաների դեմ ամենամեծ կոտորածն իրականացնելուց հետո», - հայտարարել է Իսրայելի վարչապետը։ Նա պնդել է, որ այս որոշումը «հսկայական վնաս» է հասցրել ոչ միայն Իսրայելին, այլև ողջ Մերձավոր Արևելքին։

Հարցազրույցի ընթացքում Նեթանյահուն կոչ է արել եվրոպացի առաջնորդներին «չկերակրել կոկորդիլոսին, քանի որ այն ձեր հետևից կգա, երբ խժռի Իսրայելը»։ Նա հավելել է, որ Իսրայելը «մղում է ազատ աշխարհի ճակատամարտը՝ թույլ չտալու համար, որ բարբարոսները ներխուժեն Եվրոպա»։

Անդրադառնալով ԱՄՆ-ի միջնորդությամբ ձեռք բերված հրադադարի համաձայնագրին՝ Նեթանյահուն նշել է, որ «պատասխանատվությունը «ՀԱՄԱՍ»-ի վրա է», որը պետք է ընդունի գործարքը և վերադարձնի պատանդներին։ Եթե «ՀԱՄԱՍ»-ը հրաժարվի, ապա, ըստ նրա, Իսրայելը կստանա ԱՄՆ-ի լիակատար աջակցությունը՝ պատերազմը ռազմական ճանապարհով ավարտին հասցնելու համար։

Եզրափակելով խոսքը՝ Նեթանյահուն հույս է հայտնել, որ Եվրոպան կփոխի իր ուղղությունը։ «Մենք կնախընտրեինք ոչ միայն լավ հարաբերություններ ունենալ Եվրոպայի հետ, այլև լավ հարաբերություններ ունենալ իրատեսական Եվրոպայի հետ, որը կբերի իրական խաղաղություն՝ սարսափելի պատերազմի կրկնության փոխարեն», - ասել է նա։