Միրզոյանը և Կոսը քննարկել են ՀՀ-ԵՄ ռազմավարական օրակարգը

ՀՀ ԱԳՆ Արարատ Միրզոյանը հանդիպում է ունեցել Եվրոպական միության ընդլայնման հարցերով հանձնակատար Մարթա Կոսի հետ։

Ինչպես հայտնում են ՀՀ ԱԳՆ-ից, հանդիպման առանցքում եղել են Հայաստան-Եվրամիություն համագործակցության ընդլայնմանն ու ամրապնդմանն առնչվող առանցքային հարցերը։

Զրուցակիցները քննարկման ընթացքում գոհունակությամբ նշել են ՀՀ-ԵՄ գործընկերության նոր՝ ռազմավարական օրակարգի հաստատման կարևոր հանգամանքը։ Կողմերը կարևորել են այդ փաստաթղթի դերը երկկողմ հարաբերությունների հետագա զարգացման գործում։

Բացի այդ, հանդիպման մասնակիցները երկուստեք ընդգծել են իրենց հանձնառությունն ու պատրաստակամությունը՝ ակտիվորեն աշխատելու համագործակցության խորացման ուղղությամբ։

Խոսքը վերաբերում է նոր հաստատված ռազմավարական օրակարգով նախատեսված բոլոր ոլորտներին, որտեղ կողմերը մտադիր են ծավալել արդյունավետ աշխատանք։