ԵԽ-ն Ուկրաինայի հարցով բանաձև է ընդունել

Եվրոպական խորհրդարանը նոյեմբերի 27-ին կայացած լիագումար նիստի ընթացքում ընդունել է Ուկրաինային վերաբերող բանաձև, որով հստակ ուղերձ է հղել միջազգային հանրությանը և ԵՄ կառույցներին։ Ստրասբուրգում կայացած քվեարկության արդյունքները վկայում են եվրոպացի օրենսդիրների մեծամասնության միասնական դիրքորոշման մասին. փաստաթղթին կողմ է քվեարկել 401 պատգամավոր, դեմ՝ 70-ը, ձեռնպահ է մնացել 90-ը։

Ընդունված բանաձևի առանցքային կետերից մեկը վերաբերում է ԵՄ դերակատարմանը։ Եվրախորհրդարանը կոչ է արել ԵՄ-ին ցուցաբերել իրական առաջնորդություն խաղաղության հասնելու ճանապարհին և ստանձնել ավելի մեծ պատասխանատվություն եվրոպական անվտանգության ապահովման գործում։

Փաստաթղթում հատուկ ընդգծվում է, որ կայուն և տևական խաղաղությունը հնարավոր չէ միայն կրակի դադարեցմամբ։ Ըստ եվրոպացի խորհրդարանականների՝ անհրաժեշտ են անվտանգության հուսալի և ամուր երաշխիքներ Ուկրաինայի համար ինչպես Եվրամիության, այնպես էլ Միացյալ Նահանգների կողմից։ Ավելին, այդ երաշխիքները իրենց ուժով և բովանդակությամբ պետք է համադրելի լինեն այն պաշտպանությանը, որը նախատեսված է ՆԱՏՕ-ի և ԵՄ-ի հիմնադիր պայմանագրերով։

Բանաձևը հստակ արձանագրում է, որ Ռուսաստանի կողմից օկուպացված տարածքները ոչ մի պարագայում չպետք է ճանաչվեն որպես ռուսական ո՛չ Եվրամիության, ո՛չ էլ դրա անդամ պետությունների կողմից։ Դրվում է նաև բանակցային գործընթացի կարևոր նախապայման՝ ցանկացած խաղաղ բանակցություն պետք է ընթանա Կիևի և Բրյուսելի պարտադիր մասնակցությամբ։

Ուշագրավ է փաստաթղթի՝ Միացյալ Նահանգներին վերաբերող հատվածը։ Եվրախորհրդարանը, թեև նշում է ԱՄՆ վարչակազմի գործադրած ջանքերը՝ ուղղված Ուկրաինայի դեմ Ռուսաստանի ագրեսիվ պատերազմի դադարեցմանը, այդուհանդերձ լուրջ մտահոգություն է հայտնում Վաշինգտոնի քաղաքականության մեջ նկատվող «երկիմաստության» կապակցությամբ։ Պատգամավորների համոզմամբ՝ նման անորոշությունը վնասակար է ամուր խաղաղության հասնելու տեսանկյունից։ Շեշտվում է, որ խաղաղության համաձայնագիրը չպետք է սահմանափակի Ուկրաինայի՝ սեփական ինքնիշխանությունն ու տարածքային ամբողջականությունը պաշտպանելու կարողությունը, ինչպես նաև ազատորեն, առանց Ռուսաստանի վետոյի իրավունքի, սեփական քաղաքական և պաշտպանական դաշինքներն ընտրելու իրավունքը։

Բանաձևի մի ամբողջ հատված նվիրված է Ռուսաստանի պատասխանատվությանը և ֆինանսական հատուցման մեխանիզմներին։ Եվրախորհրդարանը պնդում է, որ խաղաղության ցանկացած համաձայնագիր պետք է նախատեսի Ռուսաստանի կողմից Ուկրաինային պատճառված նյութական և ոչ նյութական վնասների լիակատար փոխհատուցում։

Վերջում Եվրախորհրդարանն ընդգծել է իր կոշտ դիրքորոշումը պատժամիջոցների հարցում՝ հայտարարելով, որ Ռուսաստանի դեմ սահմանված պատժամիջոցները չպետք է հանվեն այնքան ժամանակ, քանի դեռ խաղաղության համաձայնագիրը ամբողջությամբ կյանքի չի կոչվել։