Դաղստանում հայտնաբերվել է 480 սատկած փոկ

3 DEC 2025 06:33

Դաղստանում՝ Կասպից ծովի ափամերձ տարածքներում, հայտնաբերվել է ավելի քան 480 սատկած փոկ: Դաղստանի պաշտոնական աղբյուրների համաձայն՝ գիտնականները կենդանիների զանգվածային անկման հիմնական պատճառ են համարում ծովի հատակից բնական գազի արտանետումները, որոնք պայմանավորված են եղել սեյսմիկ ակտիվությամբ: Ըստ մասնագետների՝ կենդանիները պարզապես խեղդվել են գազի արտանետումներից:

Իրավիճակն առավել մտահոգիչ է, քանի որ փոկերի այս տեսակը գրանցված է Կարմիր գրքում և գտնվում է անհետացման լուրջ վտանգի տակ:

Այս պահին մասնագետներն ակտիվորեն զննում են Մախաչկալայի, Ղարաբուդախկենտի, Կայակենտի և Դերբենտի շրջանների ափամերձ գոտիները:

Բնապահպանական գերատեսչությունը համապատասխան գրություններ է ուղարկել բոլոր պատասխանատու կառույցներին՝ դեպքի հանգամանքները մանրամասն պարզելու և անհրաժեշտ միջոցառումներ իրականացնելու նպատակով: