Թրամփը զանգահարել է Հունգարիայի վարչապետին՝ Ուկրաինայի հարցով

ԱՄՆ նախագահ Դոնալդ Թրամփը զանգահարել է Հունգարիայի վարչապետ Վիկտոր Օրբանին՝ հարցնելու, թե ինչու է նա խոչընդոտում Ուկրաինայի՝ Եվրամիությանը անդամակցելու մասին բանակցություններին։ Ըստ Bloomberg-ի, զանգը տեղի է ունեցել ԱՄՆ նախագահի, Ուկրաինայի նախագահ Վլադիմիր Զելենսկու և ԵՄ երկրների ղեկավարների հետ բանակցություններից հետո:

Սպիտակ տանը կայացած հանդիպման ժամանակ եվրոպացի դաշնակիցները խնդրել են Թրամփին օգտագործել իր ազդեցությունը Հունգարիայի վարչապետ Վիկտոր Օրբանի վրա՝ ստիպելու նրան հրաժարվել Ուկրաինայի ԵՄ անդամակցության դեմ իր առարկություններից։ Հայտնի է, որ բանակցություններից հետո Թրամփը երկուշաբթի օրը երկու զանգ է կատարել՝ Ռուսաստանի նախագահ Վլադիմիր Պուտինին և Օրբանին։

Ինչպես Սպիտակ տունը, այնպես էլ Հունգարիայի վարչապետի գրասենյակը չեն հաստատել Թրամփի և Օրբանի միջև հեռախոսազրույցի մասին տեղեկությունը։

Հաջորդ օրը Հունգարիայի վարչապետը սոցիալական ցանցերում գրել է, որ շարունակում է չաջակցել Ուկրաինայի՝ ԵՄ-ին անդամակցությանը։ «Ուկրաինայի անդամակցությունը Եվրամիությանը որևէ անվտանգության երաշխիք չի տալիս։ Հետևաբար, անդամակցությունը անվտանգության երաշխիքների հետ կապելը անտեղի է և վտանգավոր»,- գրել է Օրբանը։