Բելգիայի ոստիկանությունը խուզարկել է ԵՄ դիվանագիտական ներկայացուցչությունը

Բելգիայի ոստիկանությունը լայնածավալ հատուկ միջոցառումներ է իրականացրել՝ թիրախավորելով Եվրոպական միության դիվանագիտական կորպուսն ու հարակից կառույցները։ Euractiv պարբերականը, հղում անելով իրազեկ աղբյուրներին և դեպքի վայրում գտնվող ականատեսներին, մանրամասներ է հաղորդել տեղի ունեցածից։

Ըստ հրապարակման՝ բելգիական ոստիկանությունը երեքշաբթի օրն անակնկալ խուզարկություններ է իրականացրել Բրյուսելում տեղակայված ԵՄ դիվանագիտական ներկայացուցչությունում։ Սակայն գործողությունների աշխարհագրությունը դրանով չի սահմանափակվել. ոստիկանական խմբերը այցելել են նաև Բրյուգե քաղաքում գտնվող Եվրոպայի քոլեջ, ինչպես նաև խուզարկել են մի շարք մասնավոր բնակարաններ։

Այս աղմկահարույց գործողությունները կատարվում են Եվրամիության ֆինանսական միջոցների ենթադրյալ ոչ նպատակային օգտագործման փաստով սկսված հետաքննության շրջանակներում։ Իրավապահները լուրջ կասկածներ ունեն, որ եվրոպական պաշտոնյաների մասնակցությամբ տեղի են ունեցել ֆինանսական չարաշահումներ։ Մասնավորապես, հետաքննությունը կենտրոնացած է պետական գնումների ոլորտում հնարավոր խարդախությունների, կոռուպցիոն դրսևորումների և շահերի քրեական բախման դեպքերի բացահայտման վրա։

Հաղորդվում է, որ խուզարկությունների ընթացքում ոստիկանությունը հայտնաբերել և առգրավել է գործի համար կարևոր նշանակություն ունեցող փաստաթղթեր։ Բացի այդ, գործողությունների արդյունքում երեք անձ ձերբակալվել է և տեղափոխվել ոստիկանություն՝ հարցաքննության։