ՀՀ-ԵՄ հարաբերությունները երբեք այսքան սերտ չեն եղել․ Արարատ Միրզոյան

ԱՄՆ նախագահ Դոնալդ Թրամփը Տոկիոյում հանդիպում է ունեցել Ճապոնիայի առաջին կին վարչապետ Սանաե Տակաիչիի հետ։ Հանդիպման ընթացքում կողմերը ստորագրել են կարևորագույն շրջանակային համաձայնագիր, որը վերաբերում է հանքանյութերի և հազվագյուտ հողային տարրերի մատակարարման ապահովմանը։ ԱՄՆ նախագահը բարձր է գնահատել Տակաիչիի գործունեությունը՝ առանձնահատուկ նշելով ռազմական հզորության կուտակումն արագացնելու և առևտրային համաձայնագրեր ստորագրելու նրա որոշումը։

Հանդիպումը տեղի է ունեցել Տոկիոյի կենտրոնում գտնվող Ակասակա պալատի բակում։ Լուսանկարվելու պահին Թրամփը, անդրադառնալով իրենց ամուր գործընկերային հարաբերություններին, նշել է. «Սա շատ ամուր ձեռքսեղմում է»։

Դիմելով Տակաիչիին՝ Թրամփը հայտարարել է. «Ինչքան որ ես գիտեմ Սինձոյից և մյուսներից՝ դուք կդառնաք մեծ վարչապետներից մեկը։ Նաև ուզում եմ շնորհավորել ձեզ՝ առաջին կին վարչապետ դառնալու կապակցությամբ։ Սա մեծ իրադարձություն է»։

Սանաե Տակաիչին Ճապոնիայի հանգուցյալ վարչապետ Սինձո Աբեի մերձավոր դաշնակիցն է, որը հայտնի էր Թրամփի հետ իր մտերիմ հարաբերություններով և գոլֆի համատեղ խաղերով։ Որպես բարի կամքի դրսևորում՝ Տակաիչին հայտարարել է, որ Թրամփի թեկնածությունն է առաջադրելու Խաղաղության Նոբելյան մրցանակի համար։

Reuters-ի փոխանցմամբ, սպասվում է, որ Տակաիչին կառաջարկի նաև ԱՄՆ-ում ներդրումների ընդլայնված փաթեթ՝ այս տարի համաձայնեցված 550 միլիարդ դոլարի գործարքի շրջանակներում։ Այն կներառի ներդրումներ նավաշինության ոլորտում, ինչպես նաև ամերիկյան սոյայի, բնական գազի և պիկապների գնումների ավելացում։

Հանդիպման ավարտին Տակաիչին Թրամփին խորհրդանշական նվերներ է հանձնել՝ Սինձո Աբեի գոլֆի փաթերը, ճապոնացի հայտնի գոլֆիստ, խոշոր մրցաշարերի հաղթող Հիդեկի Մացույամայի ստորագրությամբ գոլֆի պայուսակ և ոսկե տերևով պատված գոլֆի գնդակ։