Ալմաթիում քննարկվել են Ասիա–Եվրոպա տրանսպորտային ուղիները

Ղազախստանի Ալմաթի քաղաքը դարձել է լայնածավալ միջազգային քննարկումների կենտրոն, որտեղ համախմբվել են Կենտրոնական Ասիայի, Հարավային Կովկասի, Մերձավոր Արևելքի և Թուրքիայի տրանսպորտի ոլորտի բարձրաստիճան պաշտոնյաները։ «Ղազախստանի տրանսպորտային շաբաթվա» շրջանակներում կայացած կլոր սեղանի ընթացքում քննարկվել են լոգիստիկայի զարգացմանն ու տրանսպորտային գործընկերության ամրապնդմանն ուղղված առանցքային հարցեր։

Հանդիպումը, որը կազմակերպվել էր «New Silk Way» (Նոր Մետաքսի ճանապարհ) բիզնես ֆորումի շրջանակներում, համախմբել էր պետական կառույցների, գործարար համայնքի և միջազգային կազմակերպությունների ներկայացուցիչների։ Միջոցառմանը մասնակցել են տրանսպորտի նախարարներ և բարձրաստիճան պատվիրակություններ Ուզբեկստանից, Բելառուսից, Ղրղզստանից, Սաուդյան Արաբիայից, Թուրքմենստանից, Պակիստանից, Աֆղանստանից, Ադրբեջանից և Վրաստանից։

Կլոր սեղանի օրակարգում առանցքային էին մի քանի հիմնական ուղղություններ։ Նախարարները մանրամասն քննարկել են տրանսպորտային գործընկերության ամրապնդման ուղիները, որոնք ենթադրում են համատեղ նախագծերի իրականացում և ընթացակարգերի ներդաշնակեցում։ Հատուկ ուշադրություն է դարձվել միջազգային տրանսպորտային միջանցքների ընդլայնման հեռանկարներին, ինչը թույլ կտա մեծացնել բեռնափոխադրումների ծավալները և կրճատել դրանց ժամկետները՝ կապելով Ասիան Եվրոպայի և Մերձավոր Արևելքի հետ։

Բացի այդ, մասնակիցներն անդրադարձել են ոլորտի թվայնացման կարևորությանը, որը համարվում է ժամանակակից լոգիստիկայի անբաժանելի մասը։ Խոսքը վերաբերում է էլեկտրոնային փաստաթղթաշրջանառության, բեռների հետագծման խելացի համակարգերի ներդրմանը և մաքսային գործընթացների պարզեցմանը։ Օրակարգում էր նաև կայուն լոգիստիկայի հայեցակարգը, որը նպատակ ունի նվազեցնել տրանսպորտի բացասական ազդեցությունը շրջակա միջավայրի վրա։