Ալբանիան «AI նախարար» ունի

13 SEP 2025 09:46

Ալբանիան դարձել է աշխարհում առաջին երկիրը, որն ունի «AI նախարար»՝ արհեստական բանականություն, որը պետական կառավարչի դեր է կատարում, հաղորդում է Politico-ն։

Վիրտուալ օգնականը անվանվել է Դիելլա, որը ալբաներենից թարգմանաբար նշանակում է «արևի լույս»։ Նեյրոնային ցանցը պատասխանատու կլինի բոլոր պետական գնումների համար։

Արհեստական բանականությանը ներկայացրել է վարչապետ Էդի Ռաման Տիրանայում կայացած Սոցիալիստական կուսակցության նիստում։

Մրցութային որոշումները նախարարություններից կփոխանցվեն թվային օգնականին։ Գործընթացը կիրականացվի փուլերով։

Ալբանիան կդառնա մի երկիր, որտեղ պետական գնումները «100%-ով զերծ են կոռուպցիայից, և յուրաքանչյուր պետական ֆոնդ, որն անցնում է այս ընթացակարգերով, 100% թափանցիկ է», – ասել է Ռաման։

Դիելլան արդեն ղեկավարում է e-Albania ազգային հարթակը, որը թույլ է տալիս բնակիչներին թվային եղանակով ստանալ գրեթե բոլոր պաշտոնական ծառայությունները։ Արհեստական բանականությունը հանդես է գալիս ալբանական հագուստով երիտասարդ կնոջ ավատարով։

Ալբանիան վաղուց է պայքարում կոռուպցիայի դեմ, հատկապես պետական կառավարման և պետական գնումների ոլորտում։ Այս հարցը բազմիցս բարձրացվել է Եվրոպական Միության կողմից իրավունքի գերակայության մասին տարեկան զեկույցներում: